میرا سفر ۔ علی سردار جعفری
ہمچو سبزہ بارہا روئیدہ ایم ۔ رومیؔ
پھر اک دن ایسا آئے گا
آنکھوں کے دئے بجھ جائیں گے
ہاتھوں کے کنول کمھلائیں گے
اور برگِ زباں سے نطق و صدا
کی ہر تتلی اُڑ جائے گی
اک کالے سمندر کی تہ میں
کلیوں کی طرح سے کِھلتی ہوی
پھولوں کی طرح سے ہنستی ہوی
ساری شکلیں کھو جائیں گی
خون کی گردش، دل کی دھڑکن
سب رنگینیاں سو جائیں گی
اور نیلی فضا کی مخمل پر
ہنستی ہوئی یہ ہیرے کی کنی
یہ میری جنّت یہ میری زمیں
اِس کی صبحیں اِس کی شامیں
بے جانے ہوے بے سمجھے ہوے
اک مشتِ غبارِ اِنساں پر
شبنم کی طرح رو جائیں گی
ہر چیز بھلا دی جائے گی
یادوں کے حسیں بت خانے سے
ہر چیز اُٹھا دی جائے گی
پھر کوئی نہیں یہ پو چھے گا
سردار کہاں ہے محفل میں
لیکن میں یہاں پھر آوں گا
بچوں کے دہن سے بولوں گا
چڑیوں کی زباں سے گاؤں گا
جب بیج ہنسیں گے دھرتی میں
اور کونپل اپنی اُنگلی سے
مٹیّ کی تحوں کو چھیڑ ے گی
میں پتیّ پتیّ کلی کلی
اپنی آنکھیں پھر کھولوں گا
سر سبز ہتھیلی پر لیکر
شبنم کے قطرے تولوں گا
میں رنگِ حِنا آہنگِ غزل
اندازِ سخن بن جاؤنگا
رُخسارِ عروسِ نو کی طرح
ہر آنچل سے چھن جاؤنگا
جاڑوں کی ہوائیں دامن میں
جب فصلِ خِضاں کو لائیں گی
رہرو کے جواں قدموں کے تلے
سوکھے ہوے پتوں سے میرے
ہنسنے کی صدائیں آئیں گی
دھرتی کی سنہری سب ندیاں
آکاش کی نیلی سب جھیلیں
ہستی سے میری بھر جائیں گی
اور سارا زمانہ دیکھے گا
ہر قصہّ میرا افسانہ ہے
ہر عاشق ہے سردار یہاں
ہر معشوقہ سلطانہ ہے
میں ایک گریزاں لمحہ ہوں
ایّام کے افسوں خانے میں
میں ایک تڑپتا قطرہ ہوں
مصروفِ سفر جو رہتا ہے
ماضی کی صراحی کے دِل سے
مستقبل کے پیمانہ میں
میں سوتا ہوں اور جاگتا ہوں
اور جاگ کے پھر سو جاتا ہوں
صدیوں کا پرانہ کھیل ہوں میں
میں مر کے امر ہو جاتا ہوں